വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

     വിശുദ്ധ  റീത്ത 1381 -ൽ  ഇറ്റലിയിലെ പെരുജിയ എന്ന സ്ഥലത്ത് ജന്മമെടുത്തു. 1457  -ൽ  76 -മത്തെ വയസ്സിൽ മരണമടഞ്ഞു.  ഭർത്താവിനെയും മക്കളെയും ആത്മീയ ജീവിതത്തിൽ വളർത്തിയ ഒരു കുടുംബിനിയായി നമുക്ക് വിശുദ്ധയെ മനസ്സിലാക്കാൻ കഴിയും. സന്യാസിനിയായി ജീവിതം നയിക്കാൻ അതിയായി  ആഗ്രഹിച്ച വിശുദ്ധയെ  മാതാപിതാക്കന്മാർ പന്ത്രണ്ടാം വയസ്സിൽ വിവാഹം കഴിപ്പിച്ചു.  പൗലോ മൻഞ്ചിനി എന്ന അവളുടെ ഭർത്താവ് പണക്കാരൻ എങ്കിലും, അധാർമികമായ ഒരു ജീവിതമാണ് നയിച്ചിരുന്നത്. 18 വർഷങ്ങൾ നീണ്ടു നിന്ന അവരുടെ വിവാഹ ജീവിതത്തിന്റെ അവസാനം അവളുടെ ഭർത്താവ് മാനസാന്തരപ്പെടുകയും, പിന്നീട് ശത്രുക്കളാൽ കൊല്ലപ്പെടുകയും ചെയ്തു. പിതാവ് കൊല്ലപ്പെട്ടതിന്റെ   പ്രതികാരം ചെയ്യാൻ മക്കൾ ഒരുങ്ങുകയും അവൾ അവരെ തടയുകയും ചെയ്തു. ഭർത്താവിന്റെ മൃത സംസ്കാര ശുശ്രൂഷയിൽ തന്നെ ഭർത്താവിന്റെ ഘാതകർക്ക്  പരസ്യമായി അവൾ മാപ്പ് കൊടുത്തിരുന്നു. എന്നാൽ, അവളുടെ മക്കൾ അന്തോണിയോയും പൗളോയും, തന്റെ  പിതാവിന്റെ  ഘാതകരോടുള്ള പ്രതികാരവുമായാണ്  വളർന്നുവന്നത്. അവൾ അവർക്ക് വേണ്ടി ദൈവത്തോട് പ്രാർത്ഥിക്കുകയും, അവർ രോഗബാധിതരായി മരണമടയുകയും ചെയ്തു. തുടർന്ന് റീത്ത, മേരി മഗ്‌ദലിന്റെ  മഠത്തിൽ ചേർന്നു.  മുപ്പത്താറാം വയസ്സിൽ അവൾ വിശുദ്ധ അഗസ്റ്റിന്റെ നിയമങ്ങൾ പാലിച്ചുകൊള്ളാം എന്ന് പ്രതിജ്ഞ ചെയ്യുകയും, തുടർന്നുള്ള 40 വർഷങ്ങൾ, പ്രാർത്ഥനയിലും, ഉപകാരപ്രവർത്തികളും ചെലവഴിച്ചു. അറുപതാം വയസ്സിൽ ഈശോയുടെ ക്രൂശിതരൂപത്തിന്റെ മുൻപിൽ പീഡാ സഹനങ്ങളെ കുറിച്ച് ധ്യാനനിമഗ്നനയായ വിശുദ്ധ റീത്തയുടെ  തിരുനെറ്റിയിൽ  ഒരു മുറിവ് രൂപപ്പെടുകയും, ഈശോയുടെ മുൾമുടിയിലെ ഒരു മുള്ള് അവളുടെ ശിരസ്സിൽ മുറിവായി അവശേഷിക്കുകയും ചെയ്തു; തുടർന്നുള്ള 15 വർഷക്കാലം ക്രൂശിതന്റെ മുറിവിനോട് അവളും ചേർക്കപ്പെട്ടു. ജീവിതത്തിന്റെ  അവസാന നാല് വർഷം ദിവ്യകാരുണ്യമായിരുന്നു അവളുടെ ഭോജ്യം; ദിവ്യകാരുണ്യം സ്വീകരിച്ചാണ് അവൾ ശക്തി പ്രാപിച്ചത്.  ഒരിക്കൽ ഒരു കുടുംബ സുഹൃത്തു അവളെ സന്ദർശിച്ചപ്പോൾ എന്തെങ്കിലും ആഗ്രഹങ്ങൾ ഉണ്ടോ എന്ന് ചോദിച്ചു, തന്റെ ഭവനത്തിലെ പൂന്തോട്ടത്തിൽ നിന്ന് ഒരു റോസപുഷ്പമാണ് അവൾ ആഗ്രഹിച്ചത്. ജനുവരി മാസത്തിൽ പൂവുകൾ വിരിയുന്ന കാലമല്ലെങ്കിലും; ആ പൂന്തോട്ടത്തിൽ ഒരു റോസാപ്പൂവ് മാത്രം വിരിഞ്ഞു നിന്നിരുന്നു.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

   വിശുദ്ധ നിക്കോളാസ് ( ബ്ര. ക്ലാവുസ്) സ്വിറ്റസർലണ്ടിന്റെ സംരക്ഷക വിശുദ്ധനാണ്. ശക്തമായ ഒരു ധാർമിക ജീവിതത്തിന്റെ ഉടമയായിരുന്ന വിശുദ്ധ നിക്കോളാസ്, 1417  -ൽ ജനിച്ചു. സമൂഹത്തിന്റെ വിവിധ തുറകളിൽ ജോലി ചെയ്തിട്ടുണ്ട്. ഇരുപത്തിയൊന്നാം വയസ്സിൽ സൈനിക സേവനത്തിൽ  പ്രവേശിച്ച നിക്കോളാസ് നിരവധി യുദ്ധങ്ങളിലും പങ്കെടുത്തിട്ടുണ്ട്. മുപ്പതാം വയസ്സിൽ വിവാഹിതനായ അദ്ദേഹം ഒരു കൃഷിക്കാരനായി തന്റെ  ശിഷ്ടക്കാലം ചിലവഴിക്കാനായി ആഗ്രഹിച്ചു. ഒരിക്കൽ അദ്ദേഹത്തിന് ഒരു ദർശനം ഉണ്ടായി; ഒരു കുതിര ഒരു ലില്ലി പുഷ്പത്തെ വിഴുങ്ങുന്നു. അദ്ദേഹത്തിന് മനസ്സിലായി  തന്റെ ആത്മീയജീവിതം ഭൗതിക ജീവിതത്താൻ മൂടി പോകുന്നതിന്റെ ദർശനമാണ് ഇതെന്ന്.    അങ്ങനെ,  1467 -ൽ തന്റെ ഭാര്യയെയും പത്തു മക്കളെയും, അവരുടെ സമ്മതത്തോടെ പിരിഞ്ഞ് സന്യാസ ജീവിതത്തിലേക്ക് പ്രവേശിച്ചു. തുടർന്ന്, എല്ലാ ദിവസവും വിശുദ്ധ ബലിയിൽ പങ്കെടുക്കാൻ കഴിഞ്ഞ ബ്രദർ, 19 വർഷക്കാലം  ദിവ്യകാരുണ്യം  മാത്രം ഭക്ഷിച്ചാണ് കഴിഞ്ഞിരുന്നത്. അദ്ദേഹത്തിന്റെ ജ്ഞാനം കേൾക്കാൻ ഒത്തിരി പേർ അദ്ദേഹത്തെ സമീപിക്കുകയും അങ്ങനെ ബ്രദർ ക്ലാവുസ് എന്ന പേര് ലഭിക്കുകയും ചെയ്തു. സഭയുടെ മതബോധന ഗ്രന്ഥത്തിൽ 226 നമ്പറിൽ അദ്ധേഹത്തിന്റെ  ഉദ്ധരണികൾ കാണാൻ കഴിയും. രാഷ്ട്രീയ ജീവിതത്തിൽ വലിയ സ്വാധീനം ചെലുത്തിരുന്ന ക്ലാവുസ് ഗവർണർ പദവി പലതവണ നിരാകരിച്ചിട്ടുണ്ട്. 1417 -ൽ ജന്മമെടുത്ത ബ്ര. ക്ലാവുസ് 1487 മാർച്ച് ഇരുപത്തിയൊന്നാം തീയതി മരണമടഞ്ഞു. 'എന്റെ  കർത്താവേ എന്റെ ദൈവമേ, നിന്നെ സ്നേഹിക്കുന്നതിൽ നിന്ന് എന്നെ തടസ്സപ്പെടുത്തുന്നതെല്ലാം നീക്കണമേ;  നിന്നോട് ചേർത്തുനിർത്തുന്നതെല്ലാം തരണമേ; നിന്നിൽ നിന്ന് എന്നെ അകറ്റുന്നതെല്ലാം എന്നിൽ നിന്ന് മാറ്റണമേ' ഈയൊരു പ്രാർത്ഥന ആയിരുന്നു ബ്രദർ ക്ലാവുസിന്റെ  ജീവിതത്തെ മുന്നോട്ടു നയിച്ചിരുന്നത്.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

              ജനോവയിലെ വിശുദ്ധ കാതറിൻ  1447  -ൽ ജനിച്ചു. സാധാരണ ജീവിതം നയിച്ചിരുന്ന ജനോവയിലെ വിശുദ്ധ കാതറിൻ 13 മത്തെ വയസ്സിൽ മഠത്തിൽ ചേരാനുള്ള ആഗ്രഹം അറിയിക്കുകയും, എന്നാൽ അത് നിരാകരിക്കപ്പെടുകയും ചെയ്തു. വലിയ സമ്പന്ന കുടുംബത്തിലെ അംഗമായ കാതറിൻ പിന്നീട് മഠത്തിൽ ചേരാനുള്ള ആഗ്രഹം പ്രകടിപ്പിച്ചിരുന്നില്ല. പതിനാറാം വയസ്സിൽ അവൾ വിവാഹിതയായി. രണ്ടു കുലീന കുടുംബങ്ങൾ തമ്മിലുള്ള ശത്രുത അവസാനിപ്പിച്ച് ഒന്ന് ചേരാനുള്ള ഒരു മാർഗ്ഗമായിരുന്നു ഈ വിവാഹം. ഒത്തിരി ആർഭാട ജീവിതം നയിച്ച ഭർത്താവ് അവളുടെ ജീവിതം സഹന പൂർണമാക്കി തീർത്തു. വിശുദ്ധയുടെ നിരന്തരമായ പ്രാർത്ഥനയാൽ ഭർത്താവ് മാനസാന്തരത്തിലേക്ക് വരികയും, പിന്നീടുള്ള ജീവിതം, സാമൂഹിക സേവനത്തിനായി അവരിരുവരും  മാറ്റിവയ്ക്കുകയും ചെയ്തു. അവരുടെ നാട്ടിൽ അതിശക്തമായ പ്ലേഗ് കടന്നുപിടിച്ചപ്പോൾ 1497 മുതൽ 1501 വരെയുള്ള കാലയളവിൽ ജീവൻ പോലും കൊടുക്കാൻ തയ്യാറായി അവൾ സേവന സന്നദ്ധയായി, രാവും പകലും രോഗികൾക്ക് വേണ്ടി ജീവൻ നൽകാൻ തയ്യാറായ വിശുദ്ധക്കു ബലമായത്  ദിവ്യകാരുണ്യ സ്വീകരണങ്ങളാണ്. ശുദ്ധീകരണാത്മാക്കളെ സംബന്ധിച്ചുള്ള വിശുദ്ധയുടെ പഠനങ്ങൾ വളരെ പ്രസിദ്ധമാണ്. വിശുദ്ധ കാതറിൻ പറയാറുണ്ട്, 'സക്രാരിയുടെ മുന്നിൽ ചെലവിട്ട നിമിഷങ്ങളാണ് എന്റെ  ജീവിതത്തിലെ ഏറ്റവും സുന്ദര നിമിഷങ്ങൾ'. വിശുദ്ധ രാത്രി ഒരു സ്വപ്നം കണ്ടു, അടുത്ത ദിവസം വിശുദ്ധ കുർബാന സ്വീകരിക്കാൻ സാധിക്കുകയില്ല. സ്വപ്നത്തിന്റെ ഫലമായി ഉറക്കത്തിൽ അധികമായി ദുഃഖം അനുഭവിക്കുകയും, തുടർച്ചയായി കരയുകയും ചെയ്തതിന്റെ  ഫലമായി കരഞ്ഞു കലങ്ങിയ കണ്ണുകളോടെയാണ് പിറ്റേദിവസം അവൾ ബലിയിൽ പങ്കെടുത്തത്.  പ്ലേഗ് അതിശക്തമായി പടർന്നുകൊണ്ടിരുന്നപ്പോൾ അവളുടെ  നാട്ടിൽ ബലിയർപ്പണം ഇല്ലാതെ വന്നപ്പോൾ മയിലുകൾ താണ്ടി ഒരു അഭയ സങ്കേതത്തിൽ ചെന്ന് വിശുദ്ധ കുർബാന സ്വീകരിച്ചതിനെക്കുറിച്ചു വിശുദ്ധ പറഞ്ഞത്, 'തീക്കനലിൽ കൂടി നടക്കേണ്ടി വന്നാലും ദിവ്യകാരുണ്യം കൈക്കൊള്ളാൻ ഞാൻ തയ്യാറാവും.'   എല്ലാ നോമ്പുകാലങ്ങളിലും  ദിവ്യകാരുണ്യ മാത്രം സ്വീകരിച്ചാണ് അവൾ കഴിഞ്ഞിരുന്നത്.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

 ഒത്തിരിയേറെ ദർശനങ്ങൾ ജീവിതകാലത്ത് ലഭിച്ച വ്യക്തിയാണ് വാഴ്ത്തപ്പെട്ട അന്ന കാതറിൻ എമിറിച്, സെപ്റ്റംബർ 1774  -ൽ,  ജർമനിയിൽ മ്യൂണ്സ്റ്റർ എന്ന  സ്ഥലത്ത് ജനിച്ചു. ചെറിയ പ്രായത്തിൽ തന്നെ പരിശുദ്ധ അമ്മയുടെയും, ഈശോയുടെയും സന്ദർശന ഭാഗ്യം അവൾക്കുണ്ടായിരുന്നു. ഈശോയുടെ പരസ്യ ജീവിതവും, കുരിശു മരണവും, ദൈവത്തെക്കുറിച്ചുള്ള വിവിധ ദർശനങ്ങളും  അവൾക്കുണ്ടായിരുന്നു. അത് ഒത്തിരി പേരെ ആത്മീയ ജീവിതത്തിൽ മുന്നോട്ടു പോകാൻ സഹായിച്ചിട്ടുണ്ട്. രോഗബാധിതയായി, അന്ന് അധിക കാലവും കിടക്കയിലാണ് ചെലവഴിച്ചിരുന്നത്. ഒരിക്കൽ ആരാധനയിൽ പങ്കെടുക്കുമ്പോൾ ദിവ്യമണവാളൻ   രണ്ട് കിരീടങ്ങളുമായി അവളെ സമീപിച്ചു. ഒന്ന് മുള്ളുകൾ കൊണ്ടുള്ളതും, മറ്റൊന്ന് പൂവുകൾ കൊണ്ടുള്ളതും. അവൾ മുള്ളുകൊണ്ടുള്ള കിരീടമാണ് തെരഞ്ഞെടുത്തത്; പഞ്ചാക്ഷധധാരിയായിരുന്ന വിശുദ്ധ  കത്തോലിക്കാ സഭയുടെ ഭാവിയെ സംബന്ധിക്കുന്ന ഒത്തിരി പ്രവചനങ്ങൾ വിശദീകരിക്കുകയും,  വെളിപ്പെടുത്തുകയും, അന്ത്യനാളുകളിൽ  സഭ കടന്നു പോകാനിരിക്കുന്ന അതിഭീകര  സഹനങ്ങളെകുറിച്ചും പ്രവചിക്കുകയും ചെയ്തിട്ടുണ്ട്.  49 വർഷങ്ങൾ ജീവിച്ച വിശുദ്ധ 28 -മത്തെ വയസിലാണ് അഗസ്റ്റീനിയൻ സന്യാസനീ  സമൂഹത്തിൽ  ചേരുന്നത്.  1824 ഫെബ്രുവരി ഒമ്പതാം തീയതി മരണമടയുന്നതിന് മുൻപ് 12 വർഷക്കാലം ദിവ്യകാരുണ്യം മാത്രം ഭക്ഷിച്ചാണ് അവൾ ജീവിച്ചിരുന്നത്. 

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

    ലീമായിലെ വിശുദ്ധ റോസ്, തീക്ഷ്ണ മതിയായ ഒരു വിശുദ്ധയാണ്. റോസ് 1586 ഏപ്രിൽ 30 -ന് പെറുവിലെ ലീമയിൽ ജനിച്ചു. ഒരു സന്യാസിനിയായി  ജീവിക്കാൻ അതിയായി ആഗ്രഹിച്ചിരുന്ന അവളെ പിതാവ് അതിൽ നിന്ന് വിലക്കി. തുടർന്ന്,  ഭവനത്തിൽ തന്നെ ഏകാന്ത ജീവിതം നയിച്ചയവൾ; അതീവ സുന്ദരിയായിരുന്നു. ഒത്തിരി പേർ അവളെ പരിണയിക്കാൻ ആഗ്രഹിച്ചിരുന്നു; ഇതറിഞ്ഞപ്പോൾ വിശുദ്ധ മുടിമുറിച്ച് കളഞ്ഞു,  മുഖം വിരൂപമാക്കി. ദേവാലയത്തിൽ വിശുദ്ധ ബലിയർപ്പണത്തിൽ പങ്കെടുത്തതിനുശേഷം ഒത്തിരിനേരം വിശുദ്ധ, ദേവാലയത്തിൽ പ്രാർത്ഥനയിൽ ചെലവഴിച്ചിരുന്നു. പാവങ്ങളെ സഹായിക്കുന്നതിനായി പലതരം കൈത്തൊഴിലുകൾ അഭ്യസിച്ചിരുന്ന വിശുദ്ധ അവസാന നാളുകളിൽ ദിവ്യകാരുണ്യ മാത്രം ഭക്ഷിച്ചാണ് കഴിഞ്ഞിരുന്നത്. ദേവാലയത്തിൽ വിശുദ്ധ പ്രവേശിക്കുമ്പോൾ അമ്മയുടെ കരങ്ങളിൽ പിടിച്ച് അതീവ തളർന്നവളായി കാണപ്പെട്ടിരുന്നു, വീണ്ടും  വിശുദ്ധ കുർബാന സ്വീകരണത്തിനു ശേഷം ഊർജസ്വലതയായി കാണപ്പെട്ടു. 31 വയസ്സ് മാത്രം ജീവിച്ചിരുന്ന റോസ് 1617 ആഗസ്റ്റ് മാസം മരണമടഞ്ഞു. ചെറുപ്പത്തിൽ അവളുടെ പേര് ഇസബെൽ എന്നായിരുന്നുവെങ്കിലും, അവളുടെ ചെറിയ പ്രായത്തിൽ ഒരു പരിചാരിക വിശുദ്ധയുടെ മുഖം, റോസപ്പൂവിനെ തുല്യം തിളങ്ങുന്നത് ദർശിക്കുകയും തുടർന്ന് റോസ് എന്ന പേരിൽ അറിയപ്പെടുകയും ചെയ്തു.  

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

   വിശുദ്ധ ജമ്മ ഗൽഗാനി; സഹനത്തിന്റെ പുത്രി എന്നാണ് വിശുദ്ധയെ  ഏവരും വിശേഷിപ്പിച്ചിരുന്നത്. അത്രമാത്രം, ഈശോയുടെ കുരിശു മരണത്തോട് ഐക്യപ്പെട്ടു ജീവിക്കാൻ അവൾക്കു കഴിഞ്ഞിരുന്നു. 1878 മാർച്ച് 12 -നു ഇറ്റലിയിലെ ലൂക്കാ എന്ന പട്ടണത്തിൽ അവൾ ജനിച്ചു. ചെറുപ്പത്തിൽ തന്നെ ആത്മീയ ജീവിതത്തോട് ഒത്തിരി സ്നേഹം കാണിച്ചിരുന്ന വിശുദ്ധയാണ് ജമ്മ ഗൽഗാനി. ആദ്യകുർബാന സ്വീകരണത്തിനു ശേഷം തന്റെ സഹപാഠിയോട് കൊച്ചു ജമ്മ ചോദിച്ചു 'എന്റെ  ഹൃദയം കത്തിയെരിയുകയാണ്. നിനക്കും അത് അനുഭവപ്പെടുന്നുണ്ടോ?' അന്ന് കത്തിപ്പടർന്ന അഗ്നി  അവസാന നാളുവരെ അവളുടെ ജീവിതത്തിൽ കെടാതെ നിന്നിരുന്നു. അവൾ പറയുമായിരുന്നു, 'കർത്താവിന്റെ  സന്നിധിയിൽ ഞാൻ ഇരിക്കുമ്പോൾ കത്തി ചാരമായി  തീരുമോയെന്ന്  ഭയപ്പെടുന്നു',  'സ്വർഗ്ഗത്തിൽ ഒരു പള്ളിക്കൂടം ഉണ്ട്; സ്നേഹമാണ് പാഠാവലി, ബലിയർപ്പണമാണ് പാഠശാല, ക്രിസ്തുവാണ് ഗുരു, പാഠ്യവിഷയം അവന്റെ ശരീര രക്തങ്ങളാണ്,' വിശുദ്ധയുടെ വാക്കുകളാണിത്. വിശുദ്ധ ജെമ്മയെ പരീക്ഷിക്കുന്നതിന് ഒരു ദിവസം അവളുടെ കുമ്പസാരക്കാരൻ വിശുദ്ധ കുർബാന സ്വീകരണം വിലക്കിയപ്പോൾ അവൾ കരഞ്ഞുകൊണ്ട് ആത്മീയ ഗുരുവിന് കത്തെഴുതി. അതിൽ, അവളെ യേശുവിനെ സ്വീകരിക്കുന്നതിൽ നിന്ന് കുമ്പസാരക്കാരൻ വിലക്കി എന്നും, അവളുടെ കൈകൾ വിറയ്ക്കുന്നതുമൂലം കൂടുതലായി എഴുതാൻ കഴിയുന്നില്ലെന്നും, അവൾ കരയുകയാണെന്നും കുറിച്ചുവെച്ചു. ദിവ്യകാരുണ്യത്തെ  പ്രണയിച്ച ഒരു മാലാഖയായിരുന്ന അവൾ എഴുതി, യേശു എനിക്ക് തരുന്ന ആ മാധുര്യമേറിയ ആഹാരത്താൽ വീണ്ടും വീണ്ടും ശക്തി പ്രാപിക്കേണ്ടത് എന്റെ വലിയൊരു ആവശ്യമായി ഞാൻ കരുതുന്നു. യേശു എല്ലാ ദിവസവും തരുന്ന ആ സ്നേഹമസ്രണമായ ആ  മരുന്ന് എന്നിൽ ചൈതന്യം ഉണ്ടാക്കുകയും; എന്റെ  ഹൃദയ വാത്സല്യം മുഴുവൻ ഉൾക്കൊള്ളുകയും ചെയ്യുന്നു. ജമ്മ ഗൽഗാനി അവസാനത്തെ ഒരു വർഷം ദിവ്യകാരുണ്യം മാത്രം ഭക്ഷിച്ചാണ് കഴിഞ്ഞിരുന്നത്.   

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

   വി. ജോസഫ് കുപ്പർത്തിനോ 1603 ജൂൺ പതിനേഴാം തീയതി ഇറ്റലിയിൽ ജന്മമെടുത്തു. ഫ്രാൻസിസ്കൻ സഭാംഗമായ വിശുദ്ധൻ, 'പറക്കും വിശുദ്ധൻ,' എന്നാണ് അറിയപ്പെടുന്നത്. ഈശോയുമായി, അഭേദ്യമായ ഒരു ഹൃദയ ബന്ധത്തിനുടമയായിരുന്നു ജോസഫ്; നിശബ്ദതയിൽ അവിടുന്നുമായി സംഭാഷണത്തിൽ  മുഴുകി, ശുശ്രൂഷ ചെയ്യുകയായിരുന്നു ഏറ്റവും സന്തോഷകരമായ കാര്യം. പഠനകാര്യങ്ങളിൽ ഒത്തിരി പിന്നിലായിരുന്നുവെങ്കിലും, ദൈവകൃപയാൽ പുരോഹിതനായി തീർന്നു. വിശുദ്ധ കുർബാനയുടെ വലിയ ഭക്തനായ വി. ജോസഫ് കുപ്പർത്തിനോ വിശുദ്ധ ബലിയർപ്പണവേളയിൽ പറന്നുയരുമായിരുന്നു; ശരീരത്തിൽ നിന്നകന്നു, ദൈവവുമായി ആത്മബന്ധത്തിലായിരുന്നതിന്റെ  ഒരു തെളിവായിരുന്നുയിത്. 1663 -ൽ 18 സെപ്റ്റംബർ -നു അദ്ദേഹം ഇഹലോകവാസം വെടിഞ്ഞു. വിശുദ്ധൻ  തന്റെ  കൂടെയുള്ളവരോട് പറയുമായിരുന്നു എനിക്ക് ഈ 'ആട്ടിൻകുട്ടിയെ' അങ്ങനെയാണ് ദിവ്യകാരുണ്യത്തെ  അദ്ദേഹം വിശേഷിപ്പിച്ചിരുന്നത്; ആ മഹത്തായ ആട്ടിൻകുട്ടിയെ സ്വീകരിക്കാൻ കഴിയാതെ വരുന്ന ദിവസം ഞാൻ ഇഹലോകവാസം വെടിയുമെന്നതു  നിശ്ചയമാണ്. ഒരിക്കൽ ഒരു സഹോദര വൈദികൻ അദ്ദേഹത്തോട് ചോദിച്ചു, എന്തുകൊണ്ടാണ് ബലിയർപ്പിക്കുമ്പോൾ കൂദാശ കർമ്മത്തിലെ വാക്കുകൾ വിക്കി വിക്കി ചൊല്ലുന്നത്. അദ്ദേഹം പറഞ്ഞു, കൂദാശ കർമ്മത്തിലെ ഓരോ വചനങ്ങളും എന്റെ  നാവിൽ അഗ്നി പോലെയാണ് അനുഭവപ്പെടുന്നത്. ഞാൻ ആ വാക്കുകൾ ഉച്ചരിക്കുമ്പോൾ തിളച്ച ആഹാരം ഭക്ഷിക്കുന്ന ഒരുവനെ പോലെയാണ് അരുളിചെയ്യേണ്ടത്. അദ്ദേഹത്തിന്റെ  ജീവിതത്തിലെ അവസാന അഞ്ചു വർഷങ്ങൾ ദിവ്യകാരുണ്യം മാത്രം ഭക്ഷിച്ചാണ് കഴിഞ്ഞിരുന്നത്.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

    അതിശക്തമായ പ്ലേഗ് പടർന്നു പിടിച്ചു കൊണ്ടിരുന്ന കാലഘട്ടത്തിൽ ഇറ്റലിയിലെ സിയന്നായിൽ  1347 മാർച്ച് 21 -നു   വിശുദ്ധ കാതറിൻ ഓഫ് സിയന്നാ ജനിച്ചു. മാതാപിതാക്കന്മാരുടെ 25 - മത്തെ സന്താനമായി ജനിച്ചയവൾ ഒത്തിരിയേറെ ദൈവകൃപയാൽ അനുഗ്രഹിക്കപ്പെട്ടു. അവരുടെ മക്കളിൽ ഒത്തിരി പേർ ശൈശവകാലത്തെ അതിജീവിക്കാൻ പര്യാപ്തരായിരുന്നില്ല; ജന്മമെടുത്ത ഇരട്ട സഹോദരിയും നിത്യ നിദ്രയെ പുൽകി. 6 വയസുമുതൽ  മിസ്റ്റിക് അനുഭവങ്ങൾ ഉണ്ടായിരുന്ന കാതറിൻ പന്ത്രണ്ടാം വയസ്സിൽ ക്രിസ്തുവിനെ മണവാളനായി വരിച്ച്, നിത്യകന്യകാത്വം വാഗ്ദാനം ചെയ്തു. പതിനാറാം വയസ്സിൽ സഹോദരി മരണമടഞ്ഞപ്പോൾ, സഹോദരി ഭർത്താവുമായി വിവാഹിതയാകാൻ കുടുംബാംഗങ്ങൾ ആവശ്യപ്പെട്ടപ്പോൾ, മുടിമുറിച്ച് നിരന്തരം ഉപവാസത്തിലേക്ക് പ്രവേശിച്ചു. മാതാപിതാക്കന്മാർ അവളുടെ പ്രവർത്തിയെ തടയാൻ പരിശ്രമിച്ചെങ്കിലും അതിൽ വിജയിക്കാൻ കഴിഞ്ഞില്ല. ഒത്തിരിയേറെ ആത്മീയ ജീവിതത്തിൽ വളർന്നവളെങ്കിലും കാതറിൻ  മഠത്തിൽ ചേരാൻ സന്നദ്ധത കാണിക്കാതെ വിശുദ്ധ ഡൊമിനിക്കിന്റെ തേർഡ് ഓർഡറിലേക്ക് പ്രവേശിക്കുകയുണ്ടായി. വായന പഠിച്ചത് അതിനുശേഷം ആണ്. ആത്മീയ ജ്ഞാനത്തിന്റെ വലിയൊരു മാതൃകയായിരുന്ന വിശുദ്ധ വലിയൊരു ആത്മീയ അനുഭവത്തിലൂടെ നയിക്കപ്പെടുകയുണ്ടായി; ക്രിസ്തുവുമായിട്ടുള്ള ആത്മീയ വിവാഹത്തിൽ, ക്രിസ്തു അവളെ വിവാഹമോതിരം അണിയിച്ചതായി ചരിത്രമുണ്ട്. സമൂഹത്തിൽ, ആതുര ശുശ്രുഷയിൽ ഏർപ്പെടുന്നതിൽ അവൾ ആനന്ദം കണ്ടെത്തി. തുടർന്ന്, മാനസാന്തരത്തിന്റെ വചനം പ്രഘോഷിച്ചു കൊണ്ടും, സഭയുടെ മഹത്വം  കാത്തുസൂക്ഷിക്കാൻ ആവശ്യപ്പെട്ടും അവൾ,  നിരന്തരം യാത്രയിൽ ഏർപ്പെട്ടു. സഭയുടെ ആത്മീയ കാര്യങ്ങളിലും, ഭൗതിക കാര്യങ്ങളിലും, വിശുദ്ധ താൽപര്യം കാണിക്കുകയും, ഇടപെടുകയും ചെയ്തിരുന്നു. സഭയുടെ ഇരുണ്ട കാലഘട്ടം എന്നറിയപ്പെടുന്ന നാളുകളിൽ അവിഞ്ഞോണിൽ താമസിച്ചു തുടങ്ങിയ പിതാവിനെ റോമിലേക്ക് കൊണ്ടുവരാൻ മുൻകൈ എടുത്തതെല്ലാം  ഈ വിശുദ്ധയുടെ എഴുത്തുകൾ ആണ്. ഏകദേശം 400 ഓളം ആത്മീയ എഴുത്തുകൾ അവളുടെ രചനയിൽ ഉണ്ട്. ആത്മീയ ജ്ഞാനത്തിന്റെ ഉടമയായ വിശുദ്ധ, സഭയിലെ വേദപാരംഗതയാണ്.  മുപ്പത്തി  മൂന്നാമത്തെ വയസ്സിൽ ദിവംഗതയായ ആ യുവകന്യക, ഇന്നും, സഭയിൽ ഒത്തിരിയേറെ സ്വാധീനം ചെലുത്തുന്നു. വിശുദ്ധ കുർബാനയോടുള്ള അവളുടെ സ്നേഹം അറിയുന്ന ഗ്രിഗറി  പതിനൊന്നാം മാർപാപ്പ ഒരു വൈദികനെ അവളുടെ ശുശ്രൂഷക്കു  നിയോഗിക്കുകയും, അവളുടെ രോഗക്കിടയ്ക്ക് അരികിൽ ബലിയർപ്പിക്കാൻ അനുവദിക്കുകയും ചെയ്തിരുന്നു. അവളുടെ 26 വയസ്സു മുതൽ മരണം വരെ, ഏഴ് വർഷം ദിവ്യകാരുണ്യ മാത്രം ഭക്ഷിച്ചാണ് വിശുദ്ധ ജീവിച്ചിരുന്നത്.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

   1902 -ൽ മാർച്ച്  13  -നു  ജനിച്ച ധന്യ മാർത്താ റോബിൻ ഒത്തിരിയേറെ സഹനങ്ങളിലൂടെ സഞ്ചരിച്ച് വിശുദ്ധയായി തീർന്ന പുണ്യവതി ആയിരുന്നു. ആത്മീയ കാര്യങ്ങളിൽ ആഴത്തിൽ ശ്രദ്ധ പുലർത്തിയവൾ  ആയിരുന്നില്ല അവളുടെ മാതാപിതാക്കൾ; മാർത്തായുടെ മറ്റ് സഹോദരരെ ഇത് സ്വാധീനിച്ചെങ്കിലും അവളെ ഇത് കാര്യമായി സ്പർശിച്ചിരുന്നില്ല. രണ്ടാം വയസ്സിൽ തന്നെ രോഗബാധിതയായെങ്കിലും, സഹനത്തെ; ആനന്ദത്തോടെ സമീപിച്ചിരുന്നവളും, വേദനകളെ കുരിശിലെ വിജയത്തോടു ചേർത്ത് ആഘോഷിച്ചിരുന്നവളും ആയിരുന്നു മാർത്താ. എങ്കിലും, രോഗങ്ങൾ അവളുടെ ശരീരത്തെ നിരന്തരം ആക്രമിച്ചുകൊണ്ടിരുന്നു. പതിനാറാം വയസ്സിൽ വീണ്ടും രോഗബാധിതയായി. 26 -മത്തെ വയസ്സിൽ ശരീരം പൂർണമായി തളർന്നുപോയി; പ്രകാശത്തെ നോക്കാൻ കഴിയാത്ത അപൂർവ്വ രോഗവും; ഇതിനോടൊപ്പം അവളെ കീഴ്പ്പെടുത്തിയിരുന്നു. ശിഷ്ടകാലം ഇരുണ്ട മുറിയിൽ, പ്രകാശത്തെ പോലും അഭിമുഖീകരിക്കാൻ കഴിയാതെ അവൾക്ക് കഴിയേണ്ടി വരികയാണ്. വെള്ളം പോലും ഇറക്കുന്നതിന് അതീവ ബുദ്ധിമുട്ട് അനുഭവിച്ചിരുന്ന വിശുദ്ധയ്ക്ക് ദിവ്യകാരുണ്യം സ്വീകരിക്കാൻ ആയിട്ട് ബുദ്ധിമുട്ടുണ്ടായിരുന്നില്ല. പഞ്ചക്ഷതധാരിയായ വിശുദ്ധ 1930 മുതൽ 1981 വരെ വിശുദ്ധ കുർബാന മാത്രം ഭക്ഷിച്ചാണ് കഴിഞ്ഞിരുന്നത്. ഫ്രാൻസിസ് മാർപാപ്പ ധന്യയായി  പ്രഖ്യാപിച്ചു. മാതാവിന്റെ നിരവധി സന്ദർശനങ്ങളാൽ  അവൾ അനുഗ്രഹിക്കപ്പെട്ടിരുന്നു. നീണ്ട 63 വർഷങ്ങൾ സഹനങ്ങളിലൂടെ കടന്നുപോയ വിശുദ്ധ; തന്നെ സന്ദർശിക്കുന്നവർക്കെല്ലാം ആശ്വാസത്തിന്റെയും, സാന്ത്വനത്തിന്റെയും വാക്കുകൾ പറഞ്ഞിരുന്നു. മുറിയിൽ നിന്ന് പുറത്തു പോകാൻ കഴിയാതിരുന്നവൾ പതിനായിരക്കണക്കിന് ആത്മാക്കളുടെ രക്ഷയ്ക്ക് കാരണമായി തീർന്നു. അസ്തമിച്ചുകൊണ്ടിരുന്ന സ്നേഹം ജ്വലിപ്പിക്കുക ഇതായിരുന്നു അവളുടെ ലക്ഷ്യം.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

   ജർമ്മനിയിലെ ബെവേറിയ എന്ന പട്ടണത്തിൽ 1898 ഏപ്രിൽ മാസത്തിലാണ് ധന്യ തെരേസ ന്യൂമാൻ ജനിച്ചത്. മാതാപിതാക്കളുടെ നിരന്തര സ്നേഹത്തിലും ദൈവ സംരക്ഷണത്തിലും വളർത്തപ്പെട്ട വിശുദ്ധ തെരേസ 20 വയസ്സുള്ളപ്പോൾ ഒരു അപകടത്തിൽപെടുകയും തത്‌ഫലമായി ഭാഗികമായി തളർന്നു പോവുകയും ചെയ്തു. 1919 -ആയപ്പോഴേക്കും പലവിധ രോഗബാധകളാൽ പൂർണ്ണമായി കാഴ്ച നഷ്ടപ്പെടുകയും, രോഗക്കിടയ്ക്കയിൽ ആവുകയും ചെയ്തു. തെരേസ കൊച്ചുത്രേസിയായുടെ വലിയ ഭക്തയായിരുന്നു. 1926  -ൽ  അവൾക്ക് പഞ്ചക്ഷതങ്ങൾ ഉണ്ടാവുകയും, ക്രിസ്തുവിനെ തുടർച്ചയായി ദർശനങ്ങളിലൂടെ കാണുകയും ചെയ്തിരുന്നു, പഞ്ചക്ഷതങ്ങളോടൊപ്പം ഏകദേശം 40 വർഷങ്ങൾ അവൾ വിശുദ്ധ കുർബാന മാത്രം ഭക്ഷിച്ച് ജീവിക്കുകയും ചെയ്തു. ഒരു മാസത്തോളം സഭാധികാരികളുടെ നിർദ്ദേശപ്രകാരം അവളെ നിരീക്ഷണത്തിൽ ആക്കുകയും ദിവ്യകാരുണ്യം മാത്രമാണ് ഭക്ഷിച്ചതെന്ന്  അവർ സാക്ഷ്യപ്പെടുത്തുകയും ചെയ്തു. ആരോഗ്യപരമായി, മാനസികമായി അവൾ ഒത്തിരി ആഹ്ലാദവതിയായി കാണപ്പെട്ടു. നാസി ഭരണത്തിൻ കീഴിൽ ഒത്തിരിയേറെ ബുദ്ധിമുട്ടുകളിലൂടെ ധന്യ തെരേസ ന്യൂമാൻ കഴിഞ്ഞു. 1962,  സെപ്റ്റംബർ പതിനെട്ടാം തീയതി അവൾ ഇഹലോകവാസം വെടിഞ്ഞു. സഭ ഒരു മിസ്റ്റിക്കായി അവളെ പരിഗണിക്കുന്നു.  ഒരിക്കൽ ഒരാൾ അവളോട് ചോദിച്ചു എങ്ങനെയാണ് ദിവ്യകാരുണ്യമാത്രം ഭക്ഷിച്ചു കഴിയാൻ സാധിക്കുക; അതിന് അവൾ മറുപടി പറഞ്ഞു 'രക്ഷകൻ തന്റെ ശരീരം ഭക്ഷിക്കുകയും രക്തം പാനം ചെയ്യുകയും ചെയ്യുന്നവർ നിത്യം ജീവിക്കുമെന്ന് പറഞ്ഞിട്ടില്ലേ'യെന്ന്.  ഒത്തിരിയേറെ കൃപാവരങ്ങൾ അവൾക്കുണ്ടായിരുന്നു, വിശുദ്ധ കുർബാന സ്വീകരിച്ച് അവളെ സമീപിക്കുന്നവരെയും വൈദികരേയും പ്രത്യേക വിധത്തിൽ അവൾക്ക് മനസ്സിലാക്കാൻ കഴിഞ്ഞിരുന്നു.

വിശുദ്ധ കുർബാന മാത്രം ഭക്ഷിച്ച് ജീവിച്ച വിശുദ്ധർ
Read more..

   ആധുനിക നൂറ്റാണ്ടിലെ ഏവരും വായിക്കേണ്ടതും, അറിയേണ്ടതുമായ വ്യക്തിയാണ് വാഴ്ത്തപ്പെട്ട അലക്സാണ്ടറിന മരിയ ദേ കോസ്റ്റ.  പോർച്ചുഗലിലെ, ബൽസാർ എന്ന സ്ഥലത്ത് 1904  -ൽ വിശുദ്ധ ജനിച്ചു. അവൾക്ക് 14 വയസ്സുള്ളപ്പോൾ തുന്നൽ പരിശീലന കേന്ദ്രത്തിലെ ലൈംഗിക അതിക്രമം തടുക്കാനായി രണ്ടാം നിലയിൽ നിന്ന് ജനൽ വഴി ചാടി, ശരീരം തളർന്നുപോയ കൊച്ചു വിശുദ്ധയാണ് വാഴ്ത്തപ്പെട്ട അലക്സാണ്ടറിന മരിയ ദേ കോസ്റ്റ. അമ്മയുടെ ശിക്ഷണത്തിൽ വിശ്വാസപരിശീലനത്തിലൂടെയാണ്; വ്യക്തിജീവീതവും ആത്മീയ ജീവിതവും  രൂപപ്പെട്ടത്.  ശരീരത്തിന്റെ വിശുദ്ധി സംരക്ഷിക്കാൻ ജീവത്യാഗത്തിന് തയ്യാറായ ധീര യുവതി, തളർന്ന ശരീരവുമായി ദേവാലയത്തിലേക്ക് കടന്നുവരുന്നത് ഇടവക സമൂഹത്തിന്  അതിശയവും പ്രചോദനകരവും ആയിരുന്നു. ആ അവസ്ഥയിൽ നാലു വർഷങ്ങൾ കൂടി ദേവാലയത്തിലേക്ക് പോകാനായി അവൾക്ക് കഴിഞ്ഞു. പിന്നീട് 30 വർഷങ്ങൾ രോഗക്കിടക്കയിലായിരുന്നു ജീവിതം. 1942 -ൽ ആത്മാവിന്റെ പ്രചോദനങ്ങൾക്ക് വിധേയയായി അവൾ പൂർണ്ണ ഉപവാസം ആരംഭിച്ചു. പിന്നീട് 13 വർഷങ്ങൾ ദിവ്യകാരുണ്യമായിരുന്നു അവളുടെ ഏക ഭക്ഷണം. ഭക്ഷണം നിർബന്ധിച്ച് കഴിപ്പിച്ച നാളുകളിൽ എല്ലാം ഛർദിച്ചു പോകാൻ ഇടയായി. ഡോക്ടർമാർ പരിശോധനയ്ക്ക് അവളെ  ആർച്ചുബിഷപിന്റെ  പ്രത്യേക നിർദ്ദേശപ്രകാരം, ഏകാന്തതടവിൽ പാർപ്പിച്ചു, നിരീക്ഷിച്ചു. ബന്ധു സമ്പർക്കങ്ങൾ ഒഴിവാക്കി; വിശുദ്ധ കുർബാന സ്വീകരണം മാത്രം തുടർന്നു. ഒരു മാസത്തെ നിരീക്ഷണങ്ങൾക്ക് ശേഷം ഡോക്ടർ കുറിച്ചു, 'ഭക്ഷണവും പോഷണവുമില്ലാതെ ഞാനും നിങ്ങളും മരിക്കും. എന്നാൽ, ഈ യുവതി എന്നെ അതിശയിപ്പിക്കുന്നു.' വിശുദ്ധ കുർബാന സ്വീകരണങ്ങൾ വൈകുമ്പോൾ അവളുടെ കണ്ണിനു ചുറ്റും കറുത്ത പാട് വരികയും സ്വീകരണശേഷം മുഖം പ്രസന്നമാകുന്നതിന് അവരെല്ലാം സാക്ഷ്യം വഹിക്കുകയും ചെയ്തിട്ടുണ്ട്.