പരിശുദ്ധ കുർബാന എന്നത് ദൈവത്തിനു മനുഷ്യനോടുള്ള സ്നേഹത്തിൻ്റെ മാത്രമല്ല അവിടുന്ന് മനുഷ്യനായി കരുതിവച്ചിരിക്കുന്ന എല്ലാ നന്മകളുടെയും സമാഹാരമാണ് !!
Read more..

    ദൈവത്തിൻ്റെ ദൃഷ്ടിയിൽ ഏറ്റവും പ്രീതികരവും, പാപികൾക്ക് നേരെയുള്ള ദൈവക്രോധം ശമിപ്പിക്കാനും, നാരകീയ ശക്തികളെ കീഴടക്കാനും, ഭൂവാസികൾക്ക്  വലിയ പ്രയോജനവും, ശുദ്ധീകരണ സ്ഥലത്തിലെ ആത്മാക്കൾക്ക് വലിയ ആശ്വാസം നൽകാനും വി. ബലിയർപ്പണത്തിനു കഴിയും. ക്ലൂണിയിലെ സന്യാസിയായിരുന്നു വിശുദ്ധ ഉഡോൺ പറയുന്നതുപോലെ, പരിശുദ്ധ ബലിയിൽ  സർവ്വ ലോകത്തിന്റെയും രക്ഷ അടങ്ങിയിരിക്കുന്നു. നമ്മളോടുള്ള തൻ്റെ സ്നേഹത്തിൻ്റെ തീഷ്ണതയാൽ ദൈവം തന്നെ സ്ഥാപിച്ച ഈ ദിവ്യരഹസ്യമില്ലായിരുന്നെങ്കിൽ,  മനുഷ്യരക്ഷ സാധ്യതമാകുമായിരുന്നില്ല. പരിശുദ്ധ കുർബാന എന്നത് ദൈവത്തിനു മനുഷ്യനോടുള്ള സ്നേഹത്തിൻ്റെ മാത്രമല്ല അവിടുന്ന് മനുഷ്യനായി കരുതിവച്ചിരിക്കുന്ന എല്ലാ നന്മകളുടെയും സമാഹാരമാണ്. വിശുദ്ധ തോമസ് നമ്മെ പഠിപ്പിക്കുന്നു;  ഓരോ പരിശുദ്ധ കുർബാനയും കാൽവരിയിലെ കുരിശു മരണത്തിന്റെ തനി ആവർത്തനവും, പുനരവതരണവുമായതിനാൽ കാൽവരിയാഗത്തിൽ നിന്നുള്ളതായ ഫലങ്ങൾ ഒട്ടും കുറയാതെ, ഓരോ പരിശുദ്ധ കുർബ്ബാനയിൽ നിന്നും ലഭിക്കുന്നു. ഓരോ പരിശുദ്ധ കുർബാനയർപ്പണത്തിന്റെയും മൂല്യം, ക്രിസ്തുവിൻ്റെ കുരിശു മരണത്തിന്റെ അതേ മൂല്യമാണെന്നാണ് വിശുദ്ധ ജോൺ ക്രിസോസ്തോം പറയുന്നത്.

വിശുദ്ധ കുർബാന ഭൂമിയിൽ പ്രത്യക്ഷമാകുന്ന സ്വർഗീയാരാധനയുടെ മൂന്നാസ്വാദനമാണ്.
Read more..

   വിശുദ്ധ കുർബാനയിൽ പങ്കുചേരുന്നവർ സ്വർഗീയാരാധനയുടെ മുന്നനുഭവത്തിലാണ് പങ്കുചേരുന്നതെന്ന് സഭ പഠിപ്പിക്കുന്നു (ആരാധനക്രമം 8). നിത്യജീവൻ പ്രാപിച്ച് സ്വർഗസൗഭാഗ്യത്തിൽ എത്തിച്ചേരാൻ വിശുദ്ധ കുർബാന നമ്മെ സജ്ജരാക്കുന്നു. സ്വർഗീയസൗഭാഗ്യത്തിൽ എത്തിച്ചേരുകയാണ് വിശുദ്ധ കുർബാനർപ്പണത്തിന്റെ ആത്യന്തികലക്ഷ്യമെന്ന് വിശുദ്ധകുർബാനയിലെ പ്രാർത്ഥനകൾ വ്യക്തമാക്കുന്നുണ്ട്. റൂഹാക്ഷണപ്രാർത്ഥന ഈ ലക്ഷ്യം സ്പഷ്ടമായി പ്രതിപാദിക്കുന്നു. “ഇതു ഞങ്ങളുടെ കടങ്ങളുടെ പൊറുതിക്കും പാപങ്ങളുടെ മോചനത്തിനും മരിച്ചവരുടെ ഉയിർപ്പിലുള്ള വലിയ പ്രത്യാശയ്ക്കും നിന്നെ പ്രീതിപ്പെടുത്തിയ എല്ലാവരോടുമൊന്നിച്ച് സ്വർഗരാജ്യത്തിൽ നവമായ ജീവിതത്തിനും കാരണമാകട്ടെ". ഇതേ പ്രാർത്ഥന വിഭജനശുശ്രൂഷയിലും വിശുദ്ധ കുർബാന സ്വീകരണം കഴിഞ്ഞുള്ള കാർമ്മികന്റെ കൃതജ്ഞതാപ്രകാശനപ്രാർത്ഥനയിലും ആവർത്തിക്കുന്നുണ്ട്.
  വിശുദ്ധ കുർബാനയിലെ അനുഷ്ഠാനങ്ങളും പ്രാർത്ഥനകളും മാത്രമല്ല, ദേവാലയഘടനതന്നെയും സ്വർഗീയാനുഭവത്തിന്റെ മൂന്നാസ്വാദനത്തിലേക്ക് സൂചനകൾ തരുന്നവയാണ്. ദേവാലയം സ്വർഗത്തിന്റെയും ഭൂമിയുടെയും സംഗമസ്ഥാനമാണെന്ന് ദേവാലയഘടനയുടെ പ്രതീകാത്മകത വ്യക്തമാക്കുന്നു. സ്വർഗത്തിന്റെയും ഭൂമിയുടെയും സംഗമമാണ് വിശുദ്ധ കുർബാനയിൽ സംഭവിക്കുന്നത്. വിശുദ്ധകുർബാനയിൽ നമ്മൾ സ്വർഗവാസികളോടുമൊത്തുചേരുന്നു.
പരിശുദ്ധകന്യകാമറിയത്തോടും മാലാഖമാരോടും ശ്ലീഹന്മാരോടും സകല വിശുദ്ധരോടും ചേർന്നാണ് നമ്മൾ വിശുദ്ധകുർബാന അർപ്പിക്കുന്നത്. നമ്മുടെ കുർബാന സ്വർഗീയാരാധനയുമായി ഒന്നായിത്തീരുന്നു. വിശുദ്ധ കുർബാനയുടെ സ്വർഗീയാനുഭവമാനത്തെ വിശുദ്ധ ജോൺ പോൾ രണ്ടാമൻ മാർപാപ്പ സഭ വിശുദ്ധ കുർബാനയിൽ നിന്ന് (Ecclesia de Eucharistia, 2003) എന്ന ചാക്രികലേഖനത്തിൽ സ്പഷ്ടമായി പ്രതിപാദിക്കുന്നുണ്ട്. വിശുദ്ധ കുർബാന ഭൂമിയിൽ പ്രത്യക്ഷമാകുന്ന സ്വർഗീയാരാധനയുടെ മൂന്നാസ്വാദനമാണ്. സ്വർഗീയ ജറുസലേമിലേക്കുള്ള നമ്മുടെ യാത്രയെ പ്രകാശപൂരിതമാക്കുന്ന മഹത്ത്വപൂർണ്ണമായ സ്വർഗ്ഗീയ കിരണമാണിത്. (സഭ വിശുദ്ധ കുർബാനയിൽ നിന്ന് 19).